" Cumpagni di viaggiu ! "

" Cumpagni di viaggiu ! " In occasione della "Giornata della Memoria" il maestro Giovanni Giardina ci propone una poesia del grande Buttitta: Cumpani di viaggiu ! di Ignazio Buttitta Sta sira li cimi di l'arburi chi mòvinu la testa e li vrazza parranu d'amuri a la terra e io li sentu ! Sunnu li paroli di sempri chi vui scurdastivu, cumpagni di viaggiu nudi e pilusi,in transitu dintra gaggi di ferru Unn'è chi ghiti a càdiri si nuddu v'accumpagna e la scienza è in guerra contru l'omu? Cu vi jetta li riti mentri u marusu munta; siddu i nostromi da puisia un tempu piscatura di baleni, ora piscanu a lenza nni l'acqua marcia di li paludi? Cumpagni di viaggiu, si pirdistivu u cori pa strata; turnati nnarreri a circàllu si non siti già orbi. Si u suttirrastuvu chi morti ‘nte campi di battagghia; jiti a svrudicallu si non feti ‘nto sangu. Si ristò a bruciari ‘nte càmmiri a gas; curriti a cogghiri a cìnniri e mittitila a cuvàri ‘nto pettu. Lu me straziu è pi vui sta sira, e li paroli d'amuri càdinu ‘nterra comu stiddi astutati. Non vurria chi mai turnassi una sira, la stissa.

a cura di Peppe Paino