"Tempesta a Canneto"

"Tempesta a Canneto" Riceviamo da Giovanni Giardina e pubblichiamo: Egregio direttore, spinto dalle ultime mareggiate e autorizzato dall’autore vi voglio proporre una delle poesie dalla quale ho tirato fuori dalla mia raccolta di autori e cantautori eoliani. TEMPESTA A CANNETO ( 21 - 01 – 1981 ) di NELLO RAFFAELE A campana sunava l’avi Maria, n’ta strata “un si vidia na pirsuna, fasci’a friddu n’ta l’ossa mu sinti’a, ca chidda nun par’ia notti di luna. Dda sira io’ era tuttu ‘nduluratu, sucatu stava e sempri arricugghiutu, sinti’a ca Innaru era arrivatu, e ca lu bieddu tiempu havi’a finutu. Na vardata ci desi a li puntazza, pirchi’ mi lu discianu i me ossa, mi nn’accurgiu pero’ ch’era vunazza, e ca Ghiuozzu spicchiava n’ta la fossa. N’ta stati mi curcava sempri notti, dda vota fu n’to liettu i prima sira , c’havia i iammi debuli e stracuotti, ca nu vali’a cchiu’ di menza lira. Mi dissi n’ta la menti i cuosi i Diu e dopu ‘nta na vota m’assunnaiu ma forsi fu a Madonna o Patri Piu, si a menzanotti ‘npuntu mi svigghiaiu. Di maistru lampiava a lu gricali, e u cielu sutta i lampi era nu ‘nfiernu. lu tiempu si mitti’a sempri cchiu’ mali, ca si iucava avissi fattu tiernu . U vientu cuminciava a rifuliari, n’to strittu gia’ friscava cumu ‘on trenu ascumazzava u pilu di lu mari, sbattiennu o munti Rosa senza frenu. Finiestri e purtuna trimuliavanu, pari’a ca c’era i fora cu i spinci’a, e sempri cchiu’ i carni m’aggrizzavanu, vardannu ddu timpurali chi crisci’a. N’ta nenti visti isa’ri i cavadduna, ora a timpesta ‘un’era cchiu’ luntana, si unu sarvava a varca era furtuna , sutta a chiddu griecu e tramuntana. N’ta strata u primu cuorpu havi’a trasutu, e l’autru nun lu fasci’a cchiu’ aggirari, s’havi’a lu muragghiuni accunsintutu, e a lu terzu fini’u di campari. P’arriparari un puocu lu so nidu, la genti si ‘ntacciava li purtuna, Turi u disci;a :” sta vota nun mi fidu”, “forza carusi , e’ tiempu c’on pirduna”. Lu mari nun circava cchiu’ pirmissu, pari’a ca u paisi s’affucava, c’era cu si strinci’a o Crucifissu, vidiennu ca la casa si sfasciava. Quarcunu i fora a vista sa gudi’a, ma tanti piniavanu i duluri, vardannu tutti li cosi ca pirdi’a, ‘ n’mienzu a ddu sfrascelu di tirruri. Accuminzava a nasciri lu iuornu, e nuddu segnu c’era i carmaria, scidu’ dopu passatu lu menziornu e a sira nun sono’ l’avi Maria ! .

a cura di Peppe Paino