" San Giuseppi ! "

" San Giuseppi ! " SAN GIUSEPPI ! 19 – 03 – 2013 di Giovanni Giardina Oggi arrivo’ u iuornu i San Giuseppi trasìu ‘nta criesa e teniri ‘un mi seppi isaiu l’uocchi e chinu di rispiettu, sintìu cumu na’ fitta dintra o piettu. Vardava cumu un patri s’arriddusci purtannu sempri, tutti i iorna a Crusci ‘nta manu tieni sempri ssu’ vastùni, e u Figghiu ‘ncuoddu, mai l’ abbannuni. Ormai ca sugnu cca’, fammi pruvàri ! Ti vuogghiu sulu fari arripusàri proimèla a mmi, ‘un puocu ssa’ Criatura ! rinfriscatela ‘a spadda …….ammenu n’ura ! U fazzu cu tuttu u cori ,’ un ciercu nenti, si Tu ma duni a mmi’,… riestu cuntenti ; iò puru sugnu patri…….sugnu imparàtu ma vuogghiu sulu teniri o me latu . Puru chist’annu, Ti fannu i quadari ! ammenu i poviri hannu i chi manciari ! Cumu su belli chisti tradizioni ! Piatti i minestra e benedizioni. Mentri scrivìa stu fuogghiu, a pinna mi lassò e pi lacrimi all’uocchi, a carta si vagnò. Mi fazzu ora u signu di la Crusci, chiddu c’ancora manca, Tu dicu a vusci : “Iò vinni ccà, pi dariti n’aiutu pirchì a fedi ancora, ‘un l’haiu pirdutu “ ! Giovanni Giardina ----------------------------------

a cura di Peppe Paino